貓貓針炙記（下）：貓媽Ming媽帶貓針灸文字實錄

上文題要，現齡14歲的本地短毛黃貓貓Bobo ，因好貓友離世而變得不愛郁動，慢慢地不太能行走，獸醫建議以寵物針灸作為寵物治療的方案。究竟貓貓針炙是怎樣？由貓媽（寵主）以第一身觀察的角度告知大家吧。注意！內文有大量的愛意及溫度噢。

現時Bobo已進行了49次貓貓針灸，以下是 Ming媽的文字記錄（節錄）：

＃今日第一次睇醫生針灸。Bobo係診症室其實都算好乖同合作，只係有d依依鵝鵝，前前後後係診症室一個鐘，針15分鐘，其間係抱住佢企係到針，只係甩咗3枝。醫生話仲有8成針係到已經好好。

一離開診症室就大叫。

＃第一次針完，對腳嘅力好咗，肯企起身多咗（未針前直情唔企起身），係小別墅入面可以行到兩步。

＃今日針第二次，等候期間有自己企下起身。今次可以放佢落架針，同埋縛埋電。有進步，只係fing甩兩枝針。今日醫生話摸唔到佢入面有小便，係好事。因為佢之前控制唔到小便，無咗入貓砂盆嘅意識。返屋企後，竟然見佢自己入去貓砂盆想去廁所，雖然唔見有野屙到，但總算係良好嘅反應

Bobo加油

＃Bobo針灸第11次

呢位小姐出咗咁多次街，出門口果下依然係要大叫，有咁驚咩？

今個星期明顯多咗自己企起身，但行路就繼續拖腳。

Bobo姐幾時先記得返行路要用腳呢？

＃Bobo針灸第13次

是日Bobo係勞蘇王，好多說話，但好叻無甩針。耳仔污糟，fing耳fing到耳血腫，暫時觀察下睇下可唔可以自己吸收返。

Bobo其實好留意四周嘅事，例如：

1）等候期間，佢聽到姑娘叫另一隻貓，又係叫寶寶貓，佢即係擰個頭去望果隻貓

2）針灸期間，指比Bobo睇牆上嘅貓貓狗狗似我地屋企邊隻小朋友，佢會留心睇到聽

3）坐車返屋企時好鍾愛望風景

＃Bobo針灸第20次

上星期日Bobo嘔咗兩次，星期四懷疑又嘔一次，本來食緊嘅中藥已經停咗一個星期，嚟緊一個星期轉一轉藥，調理下腸胃。

希望無咩事啦

返到屋企，原來最緊張Bobo果個係豆豆（可能係八掛），係咁聞聞Bobo頭仔同咀咀。Bobo例牌鬧豆豆，但同佢講返原來豆豆最緊張最錫Bobo，佢錫你咋，唔好鬧佢啦，跟住豆豆再去聞佢，真係唔鬧喎。

＃Bobo針灸第22次

10月係Bobo生日月，13歲女啦又係時候做身體檢查，所以今日覆診做埋檢查，驗血報告顯示指數一齊正常，有D指數更比上年好希望Bobo繼續叻女，健健康康，對腳快D放完假唔好再偷懶

＃Bobo針灸第26次

醫生話Bobo血氣幾好，應該幾好胃口。係嘅，佢餓會叫我比野佢食，仲要成日半夜先餓。

早幾日見到Bobo爬樓梯上床時，肯用隻腳撐，醫生讚佢叻，希望佢繼續保持叻叻喵加油～

＃Bobo針灸第31次

Bobo已經係醫生同姑娘心中嘅懶鬼，醫生一見佢就叫佢懶鬼，姑娘就入嚟問佢對腳有冇偷懶。

今日醫生讚Bobo點解咁犀利，可以保持同一個體重咁耐，不過我話唔好讚，會小器，我同Bobo講，應該要重返少少好D。

但今日針得唔乖，成日撐起身想走佬。

＃Bobo針灸第32次

今日出門口好凍，仲要落雨，Bobo包到隻糉咁先出門口。唔知係因為上星期爆咗肛門腺食緊藥好攰，定係天氣凍唔想郁，醫生話佢條腰梗咗，還好肛門腺傷口康復得不錯。

＃Bobo針灸第38次

今日出門Bobo超級勞嘈，直至去到診所先安靜。今日約個時間好早，所以預咗等好耐醫生先返，等候期間叫Bobo瞓陣又唔瞓，眼光光四圍望，入到房上架就開始瞌眼瞓，針緊時仲瞓埋，第一次見佢針緊瞓得咁冧。

＃Bobo針灸第48次

今日特別勞嘈，平時針緊瞌眼瞓，今日針緊都鬧人，原來唔舒服，醫生幫佢清肛門腺時咁啱發現小便有唔妥，懷疑尿道炎。

脈象差咗少少，開始天氣轉涼要留意保暖，免得影響到個腎。平時補身嘅中藥粉量要食足D。

驗小便初步問題不太大，但要3-4日先種到菌，希望無咩事

＃Bobo針灸第49次

今日又見到朋友仔”細佬”，就係之前Bobo要偷望果位。今日問得細佬媽咪同意，影張合照。兩個就一齊坐靜靜地等。

又到年尾，今日驗埋血做身體檢查，各方面都正常，只係小便問題仲未好…即係下次又要比醫生抽小便驗。

又量血壓、又抽血，再抽小便，抱來抱去太勞累，針灸時要閉目養神了。

貓貓針灸的情況就暫時報到此，祝Bobo快點可以行走自如、身體健康啦！